“Trágica Mojiganga”

Desde o Preguntoiro

Prometín a min mesmo no volver a escribir sobre a Sra. Mariloli Cospedal, porén, antonte nunha conferencia de prensa saíu dicindo que o seu partido: “es el más diáfono y transparante de España”. Si, diáfano e transparente como o chapapote do “Prestige”.

Teño que volver a dicir que de tantos esperpentos aos que chega esta Sra. da para escribir vinte libros da deformación sistemática da realidade por medio de elementos grotescos e absurdos, onde existe nunha linguaxe coloquial expresións cínicas, ironías e burlas desa condición hispánica cun movemento orgánico dunha “tragica mojiganga”.

Desta maneira imos camiño daqueles anos de cando D. Ramón del Valle-inclán escribíra “Luces de Bohemia” un dos primeiros esperpentos. Aínda nos casos de inventiva falaba de experiencias vividas de violentas folgas, o caos desenfreado e desorden imperante dos políticos, a carestía da vida e de unha sólida base de feitos documentados, onde a habilidade inventiva de Valle-Inclán fai dos esperpentos algo comprometido cos graves sucesos inquietantes daqueles anos da Lei de Fugas.

Mariloli é o primeiro esperpento neste país dos despropósitos do século XXI. Despois da que está caendo sobre o financiamento do PP oíndo cantar ao paxaro Bárcenas, preso na xaula de ouro onde parte da contabilidade do PP desde 1990 ata 2011 quedou ao descuberto a través de Internet, Mariloli ten a cínica ocorrencia de falar de “disparates monumentales”. O único disparate que existe neste intre é o incumprimento do programa electoral dese partido ao que ela pertence.

O cinismo e as mentiras son da tal magnitude que esta Sra. das peinetas e mantillas tírase un peido nun funeral e a berros vótalle as culpas ao defunto. É un exemplo da mediocridade política dese partido que ela representa, só móvelle as ambicións persoais.

Este goberno corrupto e cínico non pode permanecer nin un minuto máis ao fronte deste país, o están volvendo invivible. En calquera país minimamente democrático, non só tiñan que estar dimitidos, tiñan que estar na cadea.