Federación ibérica

Neste difícil tempo no que costa traballo manter a cohesión entre os países e nacionalidades que conforman o Estado español, hai quen propugna unha federación ibérica, unindo España e Portugal, para mellor afrontar os problemas futuros, dentro ou fóra da Unión Europea.

Certo que España e Portugal teñen maiores factores de unión que de diferencia, xa non digamos en Galicia que por cercanía, por historia, por costumes e por idioma son considerados desde hai séculos os irmáns de máis aló do Miño. Pero moito camiño temos que andar para que a desaparición das fronteiras que propiciou a entrada na Unión camiñe cara a unha integración nun só Estado, volvendo a tempos dos que a historia garda memoria pero que nada teñen que ver co mundo de hoxe.

En Portugal hai un movemento denominado Partido Ibérico que propugna a unión dos dous países, e unha corrente de simpatía neste senso, que parece ir en aumento. En España aínda é unha novidade o tema, se ben a común pertenza á Unión Europea propicia a eliminación das barreiras, o fomento das relacións, e o camiño nunha dirección que nun futuro veña resultar un resultado de homoxeneidade entre dous paises condenados a entenderse por historia e por vida nunha terra común.

Agora que empeza a haber un importante número de galegos e españois decepcionados pola Unión Europea, mirar a Portugal pode ser unha opción – complementaria ou sustitutoria segundo as circunstancias o propicien – que nunca debemos esquecer.