Outro pleno esperpéntico

DESDE O PREGUNTOIRO: OUTRO PLENO ESPERPÉNTICO

O pasado luns no Concello de Vilagarcía tivemos outro pleno esperpéntico. Esta vez algo insólito despois de máis de trinta anos de “democracia”, a policía identificou e rexistrou nunha lista aos asistentes.

O Alcalde Sr. Fole xustificou esta medida por razóns de seguridade.
Coido que todo isto pódese considerar como anticonstitucional, xa estamos fartos de coartar a liberdade por mor da seguridade, parece que o Sr. Alcalde confunde seguridade coa liberdade do cidadán a estar no pleno por asuntos que lles compete.

Cando non se escoita aos cidadáns, cando non se recibe aos colectivos para falar ou consensuar decisións importantes para a cidade, iso non é democracia, son decisións que lémbranme tempos pasados daquela “longa noite de pedra”. O único que está a facer o Sr. Alcalde e demonizar e criminalizar as protestas dos cidadáns con unha “lista negra” como se estiveramos nunha época nazi, coartando ás persoas a estar no pleno.

O Sr. Alcalde di: que están a crearlle nos plenos “guirigays” os veciños e colectivos, coido que “democracia” non é soamente que lle voten cada catro anos e logo patente de corso para facer o que lle pete dos “cataplines” (como dicía o socio do goberno municipal). Democracia é atender na lexislatura os problemas que veñen xurdindo ao longo do tempo, chamar aos afectados e expoñer tódolos puntos de vista para chegar a un acordo e levalo a cabo. Xamais tería esas protestas se non actuara como un pequeno ditador, se atendera as peticións ou consensos para tomar decisións que afecten a unha boa andaina da cidade. Soamente hai un único culpable ante a posición intransixente do goberno de Vilagarcía, ese é o Sr. Alcalde que crese un Deus na compaña dos seus fieis santos cun Judas Escariote.

Dáme a sensación que a filosofía que practica o Sr. Alcalde, concorda coa que estamos a sufrir coa mediocridade do goberno da nación, que lévannos ao desastre, tanto ético, moral e económico.

Nunha democracia, a cidadanía de ben ten todo dereito a protestar ante as inxustizas dos seus mandatarios, en especial cando non cumpren as súas promesas electorais.