A trompeta de Byrd

A trompeta de Donald Byrd deixa escapar o seu fermoso son pola fiestra na que se reflicten os raios de sol que hai un cacho saíron pola serra de San Mamede. Poucos raios porque as nubes, aínda que pasan lentamente, axiña cobren ao patrón desta galaxia.

A trompeta de Byrd cae na conta da escuridade do día e o seu son vólvese máis triste, máis melancólico no tema “I Got It Bad And That Ain´t Good”, algo así como “E iso non é bo”.

Iso non é bo, que o sol acoche neste día de verán e que a trompeta de Byrd teña cada vez un son máis queixoso. Non obstante, o tema musical, quizais pola propia tristura, é cada vez máis fermoso e máis melancólico e máis sentimental.