Manter o tipo

O resultado das eleccións do pasado domingo, como sempre, contentou a todos. Se chamamos "todos" ás tres primeiras forzas políticas, xa con representación parlamentaria, porque do resto dos partidos ou agrupacións participantes nada se soubo.

Poucos apostaban a priori por un resultado como o obtido, que adía a resolución ata dentro dunha semana cando se coñeza o resultado do voto da emigración que pode dar un escano na provincia de Pontevedra ó Psoe ou ó PP, e con el a gobernación de Galicia.

Pode o PP estar satisfeito do resultado obtido, colocándose á porta mesmo da súa quinta maioría absoluta. Están satisfeitos Psoe e Bng, facendo contas conxuntas, porque teñen mesmo na man a gobernación tan ansiada deste país que sempre lles resultou esquivo.

Todos mantiveron o tipo na noite do domingo. Porque todos tiñan motivos para mantelo. Un pouco, tamén, porque todos facían de tripas corazón para tentar contaxiar ás súas parroquias do entusiasmo que produce ter a sorte da súa parte.

Superada a fase de campaña e elección, debera ser este momento para o repouso e o respiro con tranquilidade. Pero non, porque segue en tensión a clase política ata o momento en que se clarifique definitivamente o resultado; o momento no que nos veña de América -como tantas veces- solución ó dilema que temos planteado.

En tanto, manteñan o tipo todos, que todos en principio gañaron. Aínda que uns por contar con outros. E todos eles á espera do que decidan os votos que veñen do alén.