Chove

Os que queren disfrutar dunha Semana Santa – relixiosa ou turística- no exterior, non deixan de ollar cara ao ceo, ademáis de escoitar as prediccións meteorolóxicas, para ver se chove ou non, para ver se imos ter bo tempo.

E estes días tamén, vendo a que segue a caer sobre determinados lugares estratéxicos para a política, preocupa como chove sen que por ningún lugar se note a primavera.

Chóvenlle os temas legais ao alcalde de Lugo, o que consideraba que se non había un par de imputacións era sinal de que non había dinamismo na vida local. Xa ten polo menos tres.

Chóvenlle os temas legais ao alcalde de Santiago, que desde que accedeu ao cargo non deixou de recibir chuzos de punta, deses que non hai paraugas que protexa ao que os recibe.

Choven rebaixas para pensións e prestacións, de tal xeito que os que agora se xubilan se consideran beneficiados pola Fortuna diante no futuro que cada vez se presenta máis negro.

Chóvelle axitación ao PSOE, debatíndose formas e fórmulas, para conseguir chegar a un ben difícil consenso na elección do secretario xeral do Partido en Galicia.

Chove no corazón de case todos (Celso Emilio dixit...), dubidando de que a primavera do calendario se vaia traducir de inmediato nun escenario climático e político no que escampe e a auga da choiva dea paso a un sol que nos fai tanta falla.

Pero polo de agora parece que vai seguir chovendo.