Nun punto quilométrico

No punto quilométrico 23,34 detívose o coche. Así de golpe. Sen frealo. Simplemente se apagou e perdeu velocidade. A inercia, claro, levouno uns metros máis; pero finalmente, alí quedou, no punto quilométrico 23,34.

Deus, que contrariedade! Non poder seguir. Tiven que baixar e, para máis mofa, xusto naquel momento, un sapoconcho pásame a dianteira pola beira da cuneta. Notei como estiraba o seu pescozo e como ollaba para min. Intuín ver un brillo especial nos seus ollos.

E alí, o meu Filomeno sen se mover. Parado e non respondendo tan sequera ás patadas que lle lancei á roda dereita de atrás. Seguín coa ollada á tartaruga. Oxalá che gane a lebre!, pensei.