Como en Alemania

Pechamos 2012 coas peores cifras do paro en España e en Galicia, batendo todos os records posibles se é que batir estes records é para mencionalo publicamento á vez que motivo de absoluta vergoña como colectividade, como país, que é incapaz de proporcionar un traballo ás súas xentes enderezando unha nave que camiña sen rumbo fixo.

Galicia perdeu o pasado ano arredor de corenta mil empregos, achegándose a cifra actual de parados aos douscentos oitenta mil. E poden apreciarse que verdean brotes, que melloran circunstancias, que pintan mellor as cousss para o ano no que andamos pero hai que ser temerariamente optimistas para pensar que esto está mellorando ou a punto de mellorar.

E nesto que nos enteramos que Alemania ven de pechar o mesmo ano que para nós foi tan nefasto laboralmente co paro máis baixo dos últimos vinte anos, e con cifras record de emprego, do que presumen os seus gobernantes.

Non é de extrañar que con estes resultados Alemania considere que Europa ten varias velocidades, e que se ese país vai na primeira a outros moitos tócanos a segunda na mellor dos casos. E se pensamos que as cestas económicas e laborais dun e doutro país se constrúen cos mesmos bimbios, con capital, con materias primas, con persoas, con traballo, con organización, con planificación e con accións exteriores, algo moi grave está sucedendo, xogando á nosa contra.

Posiblemente se a situación fose ao contrario, estaríamos pedindo para Alemania a saída da comunidade europea ou o establecemento de medidas correctoras que impedisen que nos arrastrasen na súa caída irremisible.

Aquí, como en Alemania, pero con signo contrario. Aparentemente, sen remedio.