A moverse!

De rapaz o sangue fervía porque era cando tiña que ferver, porque non asentabas, andabas de aquí para alá, corrías continuamente, incluso cando ías buscar un sacho e sabendo que era para suar gotas de dor.

De mozo, o sangue segue a ferver por case o mesmo e, por que non, polas mulleres, aínda que moitos fósemos pasmóns durante toda a vida.

E agora, de vellos, volves case á idade da nenez porque os fillos, que son rapaces, fante mover á velocidade dos tempos actuais. Que se actividades extra escolares, que se deportes, que se academias, que se nun lugar, que se noutro, que se coche de aquí para alá...

Ás veces, e a pesar de que teñas un esquema debuxado, erras na consecución. Que non era neste sitio, que era naquel. Que non tocaba isto, que tocaba aqueloutro. A moverse tocan!