¿Quen argallou poñe-los apóstrofos despois dos artigos?

Hai quen tiña azos de “denuncia-lo galego incorrecto” que me fire a ollada a cotío. dentro de Galicia, en Barcelona, en Madrid, ou onde se atope un “bar” ou “restaurante” de especialidades galegas. E dame moito noxo que me sirvan algún froito da nosa terra –sempre, polo xeral, dun sabor exquisito-, mentres non acabo de facer ben a dixestión a causa do letreiro, que non só non é dun galego “enxebre”, senón dunha imperfección ferinte, alarmante, que che fai que xa non che aproveite o que estás comendo. Pois que “non só de pan vive o home...”

¿Sabedes, meus amigos, a que me estou referindo, a que estou aludindo? Pois a títulos que proliferaron pola xeografía nosa coma malas herbas. ¿Non estades cansos de ve-los títulos, tan incorrectos, espallados por todas partes: “O´Pote”, “O ´Moucho”, “A ´Cociña Galega”, “O´hórreo”, “O ´pulpo”, “A ´Galiña”, “O ´lacón con grelos”, “A´Ría”, “O ´nabo de Lugo”, “A ´esparrela”, “Café O´Miño”, “Restaurante A ´Toxa”...?

¿Que diaño tentou ós donos deses negocios para que puxesen enrriba da porta os títulos devanditos, ou outros semellantes?¿Que autoridade académica consultaron antes de encarga-los para que o “disparate” este ferindo ós nosos ollos implacablemente? ¿Onde aprenderon a poñe-lo artigo seguido dun apóstrofo? ¿Quizais coidan que se trata dun xenitivo inglés? ¿Foi influencia, xa que logo, dos emigrantes, que nos ofertan en letras de molde o que non se debe poñer? ¿Ou confundiron as antiguas “contrarcións” galegas, tipo “O Tío Marcos d´a Portela” co que é máis nidio cá auga do Lor? ¡O artigo non precisa da compaña malfadada do apóstrofo!

¡Compre poñer remedio! E pronto. Senón, o contaxio segue multiplicándose a cotío. Mais pregúntome eu, inxenuamente: ¿A quen, a que Institución, lle compete “desface-los entortos”? ¿Á Real Academia da Lingua Galega? ¿Á Xunta de Galicia?

Velaiquí o que queda plantexado nestas poucas palabras de denuncia. É unha vergoña para tódolos galegos que teñamos que soporta-los títulos devanditos, cada vez que pasamos diante deles, ou nos acercamos a xantar. A min atragántaseme, xa dende o principio, mesmo a empanada, ou o pulpo á feira. ¡Fora os apóstrofos entre o artigo e o nome!