Xogos perigosos

Perigosos para o que xoga sen coñecer con exactitude as reglas do xogo. Porque os medios técnicos que a civilización actual pon nas nosas mans son tremendamente poderosos e ben utilizados son un síntoma de progreso e uns elementos definitivos para a promoción da cultura e a promoción social.

O máis recente mal exemplo de utilización de tecnoloxías que ás veces se nos van das mans é esa gravación íntima efectuada por unha concelleira do centro da península que é libre de efectuala pero unha vez conseguida corre o perigo de que voluntaria ou inadvertidamente circule por canles para as que non estaba prevista.

A difusión desa gravación foi un salto á fama da protagonista, seguramente contra a súa vontade, pero posiblemente aquí tamén se poida aplicar o primitivo refrán de “palabra dita e pedra solta, non teñen volta”. Unha vez lanzada esa gravación ao espazo infinito da Rede non hai volta atrás, independentemente de quen sexa o causante da desfeita.

Os xogos perigosos deben facerse con pleno coñecemento das reglas, das dimensións do campo no que se xogan e na repercusión de que o tema se vaia das mans – voluntariamente ou como un accidente- como un incendio forestal no máis cálido verán.