Farto

Quedei farto de lle pedir peras ao castiñeiro; porque este tan só pingaba castañas. Tampouco as troitas nadan pola estrada de Baños de Molgas a Os Milagres, nin corren polas augas do río Arnoia.

Quedei farto de lle asubiar a un pardal, porque este, en vez de me contestar, alzaba o voo e fuxía por entre as lápidas do cemiterio. Tampouco os mortos saen dos seus nichos nin os caracois sacan os seus cornos ao sol cando chove.

Quedei farto de ver pasar a vida cando, na realidade, é o tempo o que lle cuspe con rabia á morte. Tampouco a morte espera gabanzas de alguén.