Caxigueiro en Zaragoza

“Caxigueiro”, escultor mindoniense afincado na parroquia focega de San Martiño, é un recoñecido artista plástico que a cotío gaña eslabóns no seu prestixo e na valoración dunha obra de quen dí a crítica que “é un dos precursores da escultura galega contemporánea e o seu nome referencia ineludible na plástica peninsular das últimas décadas; un artista pouco convencional que se afasta por completo de toda tradición, que realmente non modela nen esculpe, senon que crea obxetos corpóreos a partir de elementos únicos”.

Cando aínda na Cidade da Cultura de Galicia permañece a súa singular “Os ollos das palabras”, Caxigueiro inaugura unha mostra antolóxica en Zaragoza, na sala Cai Luzan, no centro da cidade, vinte anos despois de que na mesma praza o fixera no Museo Pablo Gargallo coa colección “Guerreiros”, que nesta retrospectiva serve de punto de partida para revisar o realizado dende entón.

A mostra enmárcase na programación da Feira da Cerámica Contemporánea (Cerco), o mais importante certame sobre esta disciplina artística que se celebra no Estado.

A importancia que os promotores dan à presencia de Caxigueiro reflíctese na edición, excepcionalmente coidada e valiosa, dos catálogos da mesma: sobre papel de calidade suprema, a toda cor, fotografías das pezas da mostra, captadas con fondo senso artístico, e un diseño de impecable execución; todo elo enmarcando pequenos e inspirados poemas de Caxigueiro e o lúcido xuizo crítico do que é autor o pintor e poeta ourensá Ramos Baldo, nado na histórica Celanova, “vila dos poetas”, berce dalgúns dos mais eximios vates da nosa terra: o romántico Castor Elice, Curros Enriquez, Celso Emilio Ferreiro, Manuel del Caño, Méndez Ferrín…

Dí Baldo: “…exposición antolóxica que aquela capital acolle recoñecendo o traballo dun artista que, quizás pola súa discreción e a súa esixencia estética, non foi abondo valorado no seu conxunto, porque a súa é unha obra de gran ambición universal, aínda que sempre próxima ó cotidiano, á natureza, ós problemas sociais, ás inxustizas da historia”. Parabéns ó benquerido amigo.