Felicidades, Galicia!

Dicir "Felicidades, Galicia", é felicitar a todos os galegos no noso gran día dedicado á fala e a todos os que souberon utilizala para expresar os seus mellores pensamentos.

Felicitar aos galegos é ponderar que levamos medio século desde que Fernández del Riego e Gómez Román tiveron a feliz idea de propoñer á Real Academia Galega que, cada ano, tal día coma hoxe, se fixese festa na honra da fala e dos que souberon estimala.

Podemos felicitarnos todos por este medio século glorioso, novo Rexurdimento para a lingua e a literatura galegas, no que xa son cincuenta os persoeiros e persoeiras (estas, polo de agora, moitas menos) que gañan despois de mortos a súa definitiva batalla a prol da lingua, a prol de Galicia.

Hoxe é un día grande "per se", pero esa grandeza parece cobrar aínda máis potencia se consideramos que xa hai medio século que o idioma veu nacer o sol que esvaía a "longa noite de pedra".

Por iso, felicidades para todos os galegos por este día. Por iso, felicidades, Galicia!.