Regular a folga

DESDE O PREGUNTOIRO

O presidente da CEOE Sr. Rosell saíuse de madre ao comentar que un “grupito no puede paralizar un país”, e que había que regular o dereito de folga. Eu entendo desde o meu punto de vista que cando falan de “regular” quere dicir “prohibir”.

Cando fala de “grupito” estarase referindo aos banqueiros, digo eu, que son os que realmente paralizaron o país coa súa bosta de produtos derivados: burbullas inmobiliarias, hipotecas
lixo...

Os afectados pola reforma laboral non son un “grupito”, ¡ son os traballadores de todo o país!; nada di Rosell do grupito do anterior presidente “camarada” Díaz Ferrán un home que debe liderar o récord Guines na destrución de emprego. É inxusto que un pequeno grupo de “privilexiados” condenen á miseria a boa parte da humanidade e por riba lle fagan pagar os pratos rotos, isto é intolerable.

Este individuo está usando a demagoxia para boicotear a folga. El non quere negociacións sobre servizos mínimos. Non. Este “cabaleiro” pretende “regular” o dereito constitucional da
folga, algo que eu interpreto cando se debe facer folga e cando non, que traballadores teñen ese dereito e quen non o ten. Di que se garanticen os servizos esenciais, o mesmo digo eu, que se
garantice a sanidade, ensino e o dereito ao traballo.

Están a xogar co pan da xente e non se pode tirar da corda cada día que pasa, as cordas chegan a rachar, máis, cando neste país de pandeireta, mantillas e peitas o fillo do gran empresario fala de emprego, o crego de sexo, os “milicos” de paz e os políticos de cidadanía.

Este pasado domingo cento vinte mil parisienses tomaron a Bastilla. Aínda bo é que ao final do túnel quédanos París.