Ruído e silencio

Ruído na terraza. Ruído no catavento que fai ruído. Ruído na folla de loureiro que bambea contra unha galla.

Quero que o silencio colla do brazo ao ruído. Que bailen na noite de San Xoán por entre os argazos dunha lagoa con pouca auga.

Ruído no bater de as da pomba e silencio no lagarto que está ao sol. E voan os paxaros con dirección ao Oeste mentres un cento de ras realizan unha sonata para manter vivo o ambiente da lagoa.

Ruído no monte no que se atopa a lagoa. Silencio no vaivén dun asubío.

Hai asubíos que non meten ruído. Pisadas de algodón pola beira esquerda da lagoa. Ruído nas pisadas. Silencio no calcañar.