Máis solucións

A única liña de traballo nas administracións deste país en canto ao futuro económico e social está sendo a contención de gastos, xa que os ingresos non deixan de diminuir pola menor actividade económica. E a contención de gasto non fai máis que restrinxir a a actividade económica, nunha imparable espiral á que non se lle aprecia un fin previsible.

A cuestión que temos que plantearnos é se este é o único remedio, se a única solución á problemática económica actual está na restricción, despois do frenazo brutal á actividade expansiva que se rexistrou nos anos anteriores á aparición da crise que leva xa un cuatrienio de vixencia.

As restriccións aos empregados públicos, emprendedidas por todas as administracións, conteñen o gasto pero tamén condicionan as nunca boiantes economías particulares, co que o consumo se contrae e a ilusión no futuro segue camiño parello sen o menor aliciente ou motivo de confianza na situación.

Un sindicato ven de solicitar ás autoridades federais alemanas un incremento do 6,5% para os seus afiliados, como medida de loita contra o problema económico xeral, e como reivindicación dentro da situación. Aínda non tiveron resposta oficial pero non parece que vaia ser posible este aumento.

E sen embargo algunha medida hai que tomar para enderezar a situación social visto que as que ata este momento se emprenderon non levan visos de dar solución aos problemas nin de estabilizar a traxectoria da economía. Unha inxección deste tipo nos millóns das pequenas economías familiares podería e debería ser un revulsivo para fomentar o consumo, tranquilizar ás familias e normalizar a situación.

Seguro que os especialistas económicos e políticos saben como estamos, cara onde imos e que medidas tomar para solucionar os ostensibles problemas. Seguro que si, aínda que non o pareza. Pero si o sistema actual de pura contención de gasto non funciona, terán que intentar algún outro antes de que sexa demasiado tarde.