ISAAC DÍAZ PARDO, “Conservador, Inconformista e descrido”

Este 5 de xaneiro, estes Reis, foron tristes para Galicia. Deixounos Isaac Díaz Pardo, o conservador, o inconformista e o descrido, do que aprendemos que a nosa cultura pode ser internacional.

O seu rostro era o da dignidade, o da loita infinda, o da resistencia sen límites, o do home que ama ata o fondo dos ósos, o berce da memoria que trae na lingua a palabra dos antergos. Díaz Pardo era esperanza, un feito que nos unía como galegos e facíanos sentir orgullosos de selo. Foi a ponte entre a cultura do interior e a do exilio, e coa chegada da democracia non fixo renuncia algunha aos seus principios.

O capitalismo radical expropiouno do que era seu, ética e moralmente; mais nunca conseguirá expropialo da dignidade da que este sistema é analfabeto. Hoxe somos orfos intelectuais de Díaz Pardo, no seu camiño temos que intentar seguir facendo a Galicia que soñou con Luís Seoane no Laboratorio de Formas.

Foise un mestre que conseguiu adaptarse a un sistema impregnándoo dos seus valores.

Ata sempre Isaac, descansa en Paz.