Necesario optimismo

Reina un necesario aínda que mínimo optimismo en relación co panorama político e económico coa toma de posesión do novo goberno que o pasado vernes celebrou o primeiro Consello de Ministros.
Que se veña anunciando para o último venres do ano unha serie de decisións de tipo económico, anima a pensar que esto pode cambiar aínda que sexa pouco e aínda que sexa lentamente.
Temos a sensación de ter tocado fondo en canto a situación económica e anímica, e que desde aquí só se pode saír cara arriba. E non queremos crer iso que afirman de que 2012 será un ano ben difícil, peor aínda que o que estamos a rematar.
E como é difícil facer conxeniar os pronósticos agoreiros e a necesidade de confianza, a situación deriva cara á esperanza de que as novas medidas que o Goberno adopte teñan resultados favorables.
Por parte dos traballadores, agárdase creación de emprego, aínda que non vislumbremos o xeito en que vaia producirse. Os pequenos e medianos empresarios agardan que o Goberno cumpra a promesa efectuada de que non haxa que adiantar o ive facturado e só se aboe cando se cobren as correspondentes facturas. E todos, en fin, agardan – agardamos- pola dinamización da economía, animación da moral colectiva, fluidez do crédito bancario e revitalización do comercio. Moita esperanza para unha situación que para moitos é desesperada.
O próximo venres, primeiro escalón do que se agarda un camiño difícil pero no que queremos confiar esperanzados. Por pura necesidade.