Decisións

No concello pontevedrés de Crecente, con motivo das festas patronais, adoptaron un sistema de sorteo que estirando moito o concepto case podería quedar incluido como decisión salomónica.
A comisión organizadora decidiu sortear mil euros entre os parroquianos, encargando a Felisa de Remigio como “man inocente” que solucionase o problema.

Para dilucidar o premio ou premios, dividiron o campo de fútbol da localidade de Vilas en 1.008 casiñas e soltaron a vaca Felisa, propiedade do veciño Remigio, para que aplicando a lei da natureza decidise cal ou cales serían os afortunados gañadores.

Unha vez Felisa no campo, levoulle somente dous minutos determinar cos seus excrementos os catro lugares debidamente identificados que correspondían ós veciños que se ían repartir os mil euros de premio.

O resultado non pode ser máis democrático, ecolóxico, sen artificios. Ben pensado, moitas decisións que as veces tomamos os humanos terían máis fundamento e sentido se llas encomendásemos a calquera Felisa das que abundan polo noso rural.