No recanto da terraza

Estou no recanto da terraza para contemplar a paisaxe, o ambiente. A paisaxe é un dicir; unhas árbores pequenas das que non sei o seu nome e distribuídas pola beirarrúa dereita, unha palmeira e cinco testos con flores. Con diversas flores e plantas. No tocante ao ambiente; a verdade é que non está mal, ou sexa, mesas ocupadas con xente e coches pasando pola rúa. E xente pasando polas beirarrúas. Unha televisión grande emitindo imaxes e vídeos de cantantes, de éxitos, de hits, como pon na pantalla. É a cadea MTV. No recanto da terraza, a pesar dos ruídos, ás veces noto o silencio apoderarse do ambiente. Ao mellor é a paisaxe, a pobre paisaxe a que amortece o ruído. Ou a que ordena silencio. Non sei.