Morre en Bos Aires o enxeñeiro Eduardo Parajuá, Mecenas da Cultura Galega na Capital Arxentina

Eduardo Parajuá Rodríguez (Buenos Aires, 1928-2004) era fillo de galegos con raíces na montaña luguesa, concretamente na aldea de Paraxuá (parroquia de Romelle, no concello de Samos) así como en Farnadeiros e Abragán (no Corgo). En 1922 a familia emigra á Arxentina desde os seus respectivos lugares de nacemento.
 
Enxeñeiro Industrial e Náutico
Tras realizar os estudos primarios e secundarios, Eduardo Parajuá matriculouse na Escola Nacional de Náutica, onde se graduou como maquinista naval. Con posterioridade traballou como técnico na reparación de navíos e simultaneamente cursou estudos de enxeñería, obtendo a licenciatura en 1964.
 
Contemporáneo da Xerazón das Festas Minervais
Eduardo Parajuá era contemporáneo da Xerazón das Festas Minervais como Novoneyra, Méndez Ferrín, Xoana Torres ou como o recentemente finado Manuel María. A súa relación con Galiza intensificouse notabelmente con motivo da sua primeira visita ao lugar de que eran orixinarios os seus devanceiros en 1982. Ao regresar a Buenos Aires matriculouse nos cursos de Língua e Literatura impartidos no Centro Galego. Como complemento, para obter un coñecemento mais profundo do noso idioma, acudiu a cursos de gramática na Faculdade de Filoloxía da Universidade de Buenos Aires.

Da mao de José B. Abraira, en 1985, Eduardo Parajuá pasou a asumir un compromiso esencial en benefício de toda a colectividade ao se involucrar nas tarefas organizativas do Congreso en Homenaxe a Rosalía de Castro. Desde ese momento até a actualidade os seus traballos infraestruturais son imprescindíbeis para o funcionamento tanto da asociación Amigos do Idioma como para a continuidade do boletín Adigal, entidades para as que Parajuá foi un auténtico mecenas. 

Articulista e autor de narrativa breve
Alén do labor asociativo, Eduardo Parajuá é tamén autor de artigos en que se manifesta un grande gosto polo documentalismo e de diversas creacións literarias de narrativa breve.

Ferramentas informáticas
En colaboración con Manuel Iglesias e o profesor Higinio Martins participou na elaboración dun monumental diccionario informático do galego (con 560.000 bits).