Entre hortalizas

Non quero que te deites sobre o lado dereito da miña historia, na que un garavanzo percorreu cinco quilómetros para loitar ao lado da cenoria.

Hai guerras nas que o maltrato a un vexetal altera o curso da vida das verzas dunha horta.

Deixa que o sulfato que cae sobre a planta da pataca molle tamén, de pasada, á remolacha altiva e rosa.

Non quero que lle sorrías á fila dos repolos porque poden pensar que o seu regadío será eterno. E todos sabemos que sempre hai algunhas almas secas.

Hai vida máis alá dunha leira. Hai vida incluso tras unha guerra de hortalizas. Ás veces chega con que un raio de sol asome polo horizonte ou que a luz da lúa caia sobre a noite durmida.