Lugo e Ourense tamén existen

Tivo éxito mediático a campaña promovida en Teruel contra o esquecemento daquela terra: “Teruel también existe”. E a campaña non ven máis que reflectir a actividade que está tendo lugar naquel anaco de Aragón, onde un parque temático dos dinosaurios estase evidenciando un excelente reclamo para facernos acudir a Teruel dos Amantes.

Teriamos que facer algo así relativo á Galicia oriental. Porque senón, desde Madrid ou Barcelona, que entre as dúas cuadruplican a cifra de galegos residentes no País, poden chegar a pensar que non existimos.

Ven a conto porque, entre outros moitos exemplos, “La Gaceta de los Negocios” nun dos seus últimos números menciona os puntos de venta nas costas de España. Entre as provincias, Coruña. E dentro de “Coruña”, Foz e Viveiro.

Foz e Viveiro son da costa, pero da provincia de Lugo, aínda que moitos pensen que Lugo non ten costa. Moitos pensan -probas escritas hai- que Lugo é a cidade máis importante do sur de Galicia, pertencente á provincia de Pontevedra, aínda que agardemos que sexan unha mínima minoría.

Pero non nos sobraría nada unha campaña do xeito da de Teruel para lembrar a todos que Lugo e Ourense non só existen senón que en moitos aspectos poden levar dianteira sobre as máis sobranceiras de Galicia.