Súas señorías en Bruselas

DESDE O PREGUNTOIRO: SÚAS SEÑORÍAS EN BRUSELAS

O pasado xoves no Parlamento Europeo co apoio de conservadores e socialistas puxéronse de acordo (sempre o fan conxuntamente en centos de resolucións parlamentarias), para darlle 1.500 euros a cada deputado máis ao mes para que paguen aos seus asistentes, despois de que se aprobara na comisión de presupostos un aumento de 13,2 millóns de euros para esa partida a repartir entre os 736 deputados. Contra esta “moca” votaron os comunistas e os verdes.

Coido que isto e ter máis cara que un zapato vello. Isto é un escándalo, unha burla en un contexto de crise e austeridade, cando estes mesmos “señores” dos mesmos partidos votaron os recortes sociais, privatizacións e pensionazos, pagando os cidadáns os miles de millóns de euros que lle deron á banca (creadores da crise) para aumentar os beneficios aos seus accionistas e directivos.

Afirmo que son como a peste “sus señorías” conservadoras e socialistas, non teñen nin un chisco de dignidade, cando están a cobrar 6.200 euros cada mes limpos de po e palla, pagándolle nós, os contribuíntes, as viaxes en avión ou tren, cando o salario mínimo dun traballador é de 624 euros/mes. Que teñamos que cotizar 35 anos para cobrar a pensión de fame, cando “sus señorías” con sete anos xa teñan a manduca asegurada abondo sen dar un pao á auga. Son estes “traballadores” parlamentarios os únicos que están exentos de pagar o IRPF, soamente un terzo do seo soldo. Collen seis meses de vacacións, non vaia a ser que se hernien ou a “palmen”.

Soamente represéntanse a eles mesmos para as súa bicocas, van a servirse ou servir a “la voz de su amo neoliberal”, non a servir ao cidadán. Son como esa madeira ruín que xamais deu boa acha. Non en tanto, aínda temos algúns que pensaron e votaron con dignidade, como foron os verdes e os comunistas.