Pérez Touriño

O País, está por riba da “obediencia debida”. Alomenos eso debeu pensar Pérez Touriño para saír coa enerxía demostrada en defensa do Plan Galicia e, en xeral, das promesas dos socialistas na pasada campaña electoral.

Certamente, a Ministra das obras públicas púxolle as cousas difíciles ó primeiro representante do Psoe en Galicia, quen tivo que dicir que “en ningún caso vai permitir que se deixe de cumprir o prometido, especialmente no eido das infraestructuras”, recalcando que (os socialistas galegos) “non lle van permitir ó Goberno un retroceso nin revisión das posicións comprometidas electoralmente con respecto a Galicia”.

Pois ¿que queren que lles diga?... Eu estou máis tranquilo. Porque aínda que palabras de político corren un risco grande de ser levadas polo vento, esta seguridade e enerxía diante da cúpula do seu partido é de agradecer, e moito.

Que “os de provincias” se reboten de cando en cando contra “os de Madrid” non é malo, senón todo o contrario. E a min, anárquico e cun aquel de rebeldía por natureza, séntame ben este plantarse firme e dicir as cousas como se ven, sen cristal político polo medio.

¡Ben, Sr. Touriño, moi ben!.