Dez euros

Vai vir o Papa a Galicia e, de por si, é unha excelente noticia para promocionar o Xacobeo e o papel de Santiago de Compostela como terceira das cidades santas da Cristiandade. Todo o mundo católico saberá que na fin do mundo coñecido, en Galicia, se celebra cada certo tempo a festa grande do Apóstolo dos galegos.

A Xunta de Galicia ten disposta unha partida de tres millóns de euros para financiar esta viaxe nos aspectos que corresponden ós poderes civís, pero a Igrexa galega prevé tamén que os custos poden ser importantes para a institución relixiosa. E se o goberno autonómico ten a posibilidade de acudir ós presupostos xerais da Xunta para financiar acontecementos extraordinarios coma este, a Igrexa acude ós seus feligreses para pedirlles que contribúan a facer posible económicamente a estadía do Santo Pai en Galicia.

O curioso é o xeito de facer a petición, cando nas misas de moitas igrexas se solicitou un donativo de dez euros, voluntario de todos os xeitos, para que os custos da viaxe papal que correspondan á Igrexa Católica poidan ser cubertos.

Nada que obxectar a un e outro financiamento. O da Xunta é un investimento, que pode cargarse ós conceptos de gastos institucionais, publicidade, relacións públicas ou calquera outro, que a rendibilidade está garantida. Ó da Igrexa, tampouco, aínda que chame a atención a orixinalidade do sistema. A fin de contas, para os católicos a presencia do Papa en Galicia é unha excelente ocasión de reverdecer a fe de moita xente, de potenciar o papel de Compostela no noso entramado social, e de achegar Galicia ós cumios máis altos do goberno relixioso, que tampouco está tan lonxe de ter un elevado papel político.

En resume, que diante do resultado previsible, todos contentos.