A Igrexa e o Xacobeo

A Igrexa Católica ten probada sona de paciente, e segue a facer exercicio de paciencia a cotío.

Porque desde o punto de vista da Igrexa, o Xacobeo é un fenómeno relixioso que hai que procurar acomodar á tradición e á fe.

O Xacobeo, sen embargo, para a sociedade galega, é un fenómeno de masas que a visión de políticos e comerciantes ten transformado nun motor desta Galicia de comezos do milenio.

O carácter relixioso dos peregrinos de hogano é, como mínimo dubidoso. Pero a Igrexa pecha os ollos e recibe cos brazos abertos a camiñantes ou motoristas, católicos ou protestantes, políticos ou aventureiros... Todos caben na Casa de Deus da capital do occidente.

Os últimos, 64 alcaldes de outros tantos pobos polos que pasa o Camiño que, de paso que cumpren coa tradición, comproban a boa sorte que tiveron os seus pobos pola lotería que lles ten tocado por ser marco dun Camiño.

E a igrexa, paciente. Confórmase con tentar retirar da circulación o “Santo dos Croques”, e que se deixe de poñe-los dedos na columna do Pórtico da Gloria. A cambio, pantallas na Catedral, subida ós tellados, tendas nos baixos do edificio sacro. E a vivir, ¡que é o Xacobeo! (E faltan once anos para que haxa outro).