Sempre Telefónica

Telefónica ven de tropezar co muro do tribunal de Defensa da Competencia que a multou con 57 millóns de euros, unha cantidade que traducida a pesetas case nin me atrevo a poñerlle ceros detrás.

Telefónica teno difícil. Procede dun monopolio, e eso é malo. Nos meus tempos eran monopolios o subministro de gasolina, os fósforos, a enerxía eléctrica e o teléfono. Os máis recentemente liberados, estes dous últimos.

Esta liberación da lugar a ofertas curiosas como a de Gas Galicia que anda a ofrecer enerxía eléctrica en competencia directa con Begasa –Barras Eléctricas Galaico Asturianas- e Fenosa –o condado de las Fuerzas Eléctricas del Noroeste- prometendo que o seu subministro vai ser máis barato que o das compañías eléctricas.

E en telefonía, ofertas do máis variado contra o enemigo común: Ese xigante que foi Telefónica, alixeirado con xubilacións de persoal, desglose en outras empresas, e clientes que buscan ofertas máis sustanciosas.

Telefónica, aínda non afeita ó non monopolio, reacciona de xeito que se xulgou inapropiado e recibe multa multimillonaria.

Telefónica segue a pagar por ter sido monopolio. No concepto dos consumidores aínda están presentes os vellos modos. E eso tarda en cambiar.