A hora dos discapacitados: ¡Non nos fallen!

O pasado venres, o próximo presidente do Goberno, José Luís Rodríguez Zapatero, ante o Comité Federal do partido, lembrou as liñas mestras do seu goberno. Pedíulles cinco cualidades para acadar un novo País: "Proximidade ós cidadáns, capacidade para escoitar, humildade para gobernar, conducirse con austeridade e traballo". Concretou accións a seguir baixo o encabezamento "chegou a hora de..." Entre varias promesas de tipo social (teño a sensación de que dicía a verdade e que reafirmaba compromisos) apareceu a tantas veces repetida solemne frase: "chegou a hora dos discapacitados". ¡Oxalá, Sr.Presidente!. Sabemos da súa boa vontade e proxectos. O seu partido, antes de chegar ó poder no l982, tamén fixo proxectos e loitou con ideas e con forza. E, incluso, fixo moitas cousas, ó principio. Entre outras foi quen de sacar adiante a esperada LISMI (a lei de integración social dos minusválidos) que era un paso fundamental a dar, daquela. Ó pouco, esmoreceu. Houbo que recordárllelo con algunhas concentracións en Madrid. Esquecéranse dos investimentos e dunha parella lei sancionadora para que fose eficaz. A Lei só se desenvolveu nun 28%. Agora, o colectivo de diminuídos físicos (tres millóns e medio de cidadáns/ás), está en situación semellante. Os do PP, despois de moitas promesas e inexplicables retrasos sacaron a "LIO" ou sexa, a "Lei de Igualdade de Oportunidades, non discriminación e accesibilidade universal" (¡rumboso e mesmo malsoante título!) máis diminuída cós discapacitados do rural galego. Sen investimentos e co insultante prazo de 17 anos de cumplimento para algúns dos seus apartados. Sabemos que vostedes estiveron aí, que presentaron propostas e que votaron en contra. O rodicio arrasou. Xa saben o que hai que facer, vistas as promesas e proxectos. Por suposto, saboreen a habitual cortesía dos 100 días. Igual cós xoves de Madrid, a noite do trunfo, o colectivo dos discapacitados físicos tamén lles dicen...¡Non nos fallen, outra vez, por favor!.

Xesús Mato (Colectivo AdianteXá)