Patriotas de postal

Desde o preguntoiro: Patriotas de postal
Estase a rescatar aos financeiros, aos bancos, a toda esa aristocracia de “capos” das finanzas. Agora lle toca o rescate de Caja Sur con 600 millóns de euros, todo con cartos públicos. Logo nos din que todos temos que axuntar esforzos para saír desta desfeita económica. Ou sexa, que todos afinquemos o lombo, onde alguén dixo, votando a lingua pastar, como bos patriotas temos que colaborar.

Isto de “patriotas” sóame a esperpento-hispano, onde na miña testa comezan os miolos a baterse como se foran raios e treboadas. Quizais non entendín ben a quen se referían , poida ser que falaran deses “patriotas de postal” que cito a continuación: Os navieiros que teñen buques en países de bandeiras de conveniencia. Os que non fan facturas nos despachos privados de profesións liberais. Certos cantantes e artistas que todos coñecemos residentes en outros países , a saber onde pagan os impostos e “royaltis”. Algúns deportistas que teñan a dobre nacionalidade. Os que fixeron as grandes fortunas co ladrillo e cemento poñendo os cartos en países sen control fiscal. Os que defenden a súa “guita” en representación de intereses globalizados. Destes “patriotas de postal” hainos dabondo nesta “España nuestra....mi querida España.....”

Os únicos patriotas que coñezo neste país son os “currantes”, os de nómina, os que pagan para que os gobernos de quenda rescaten o sistema financeiro e fagan experimentos con gasosa inventando o comunismo en versión “para ricos”.