Campaña sen inauguracións

¿Imaxinan vostedes unha campaña electoral sen inauguracións? Eu non. É o mesmo que se se priva de promesas de grandes obras un período como o que agora mesmo estamos a vivir.
Das promesas nada se dixo en contra, e por eso queremos crer que dentro de moi pouco tempo iremos de Ferrol a Francia en seis horas por autovía, especialmente se temos en conta que o das infraestructuras marcha bastante ben neste país.
Pero a Xunta electoral de Vigo impediu que o Presidente da Xunta e a Ministra de Sanidade inauguraran un centro de maiores en Bembrive. O Presidente, de tódolos xeitos, visitou o centro e a Conselleira Cimadevila que o acompañaba cortou a cinta, co que xa me dirán en que se diferencia dunha inauguración.
Pero repito: Unha campaña sen inauguracións é unha campaña descafeinada. Se empezamos así, acabaremos por quitarlle toda a gracia a un período verdadeiramente animado da nosa vida política.