Xoves brillante

Xoves Santo, Corpus Christi e o Xoves da Ascensión. Eran os tres xoves do noso calendario que antano brillaban coma o sol. Só queda o día de hoxe, que os outros dous feneceron afogados polos novos tempos.

En tempos tamén, hoxe empezaba o calendario festeiro, e así segue a ser para os que poden permitirse catro días seguidos de festa, que moitas profesións hai que non o dan conseguido. Pero mellor aínda os que centran as vacacións nesta semana e así desde o pasado venres -que empezou a operación especial Semana Santa- andan por esas estradas de Deus, de procesión en procesión, facendo turismo do que antes foi traxedia, e hoxe os seus acontecementos figuran en todos os guieiros como elementos destacados do que hai que contemplar e no que participar para disfrutar dunha auténtica semana santa festeira.

Non importan os prognósticos do tempo, aínda que sempre está ben para viaxar e contemplar procesións que o sol brille ou alomenos non chova nin faga demasiado frío. Pero a realidade é que a festa está por enriba de todo, e faga o tempo que sexa os días de descanso son artigos de primeira necesidade que todos adoitamos disfrutar con ledicia e con fruición.

Galicia Digital desexa a todos os internautas un feliz Xoves Santo, no que se cumplan todas as perspectivas de disfrute. Que todos vaian con ben. ¡Que todos volvan con ben!.