Abusos bancarios

Neste país que ve como os monopolios desaparecen, aínda quedan situacións de privilexio. Aquí deixan de ter a exclusividade de funcionamento  a Telefónica no eido das comunicacións, Campsa nos combustibles e ata Fosforera Española no mundo dos mistos, pero hai cousas que non cambian.

Non é que os bancos sexan un monopolio, pero si un oligopolio. En teoría calquera pode fundar un banco poñendo sobre a mesa non se sabe cantos miles de millóns de euros e conseguindo a correspondente licencia. Pero unha vez situados no Olimpo da economía, Bancos e Caixas de Aforro aplican unha dictadura á que pouco lle importarán as políticas económicas para exercer de xeito absoluto o seu poder económico.

Adicae (Asociación de usuarios de bancos, caixas e Seguros) ven de presentar denuncia contra vintedúas entidades financieras por cláusulas abusivas nos cretos hipotecarios, impedindo que os seus clientes se beneficiasen de determinadas baixas do Euribor.

Polo que a Galicia respecta, están denunciadas Caixa Galicia, Caixa Nova, Banco Pastor, Banco de Galicia e Banco Galego. E outras entidades non galegas de orixe pero instaladas neste país.

Certamente, por agora, e mentras non haxa decisión xudicial, os feitos denunciados son presuntos, e así hai que entendelos. Pero aparte de estos, todo o que é cliente dunha entidade bancaria ou de aforro -a práctica totalidade dos galegos- sabe que a letra menuda segue a imperar, que as decisións das entidades non son discutibles nin dialogables, e últimamente téñense recrudecido para manter os niveis de resultados que as entidades precisan ou estiman precisar.

Nalgún momento, o goberno -o que corresponda, cando corresponda- terá que poñerse serio coas entidades bancarias e aplicar no seu funcionamento diario as normas de liberdade económica que xa rexen noutros varios sectores da sociedade.