A memoria que nos dá humanidade

O pasado venres vin, na 1 de TVE o programa "Cuanta guerra" que, capitaneado por Conchi Cejudo, anima a diversos persoeiros a descubrir a súa historia. O programa ten unha estrutura moi interesante: primeiro Conchi entrevístase coa persoa convidada, que lle conta a súa historia familiar, despois pídelle permiso para indagar sobre a mesma e posteriormente explícalle con probas as súas pesquisas.

O formato orixinal é de 3Cat pero está claro que cumpre un servicio público fundamental, contribuíndo a rescatar e contar as intrahistorias que compoñen a nosa historia. Un futuro sen pasado carece de perspectivas e corre o risco de pintar de gris o tempo. Contra isto érguese a curiosidade e o desexo de saber que sempre nos fará libres.

Fai falta analizar intrahistorias, saber todo de nós, comprender de onde e de quen vimos, coller o mellor e procurar non repetir erros. Si, fai falta pero esta memoria que nos dá humanidade supón un exercicio revolucionario cando na vida pública temos tanto ego (de precaria moralidade) desexoso de converterse en caudillo.