O encontro do 30 de setembro conmemorará o Día Internacional das Persoas Maiores con música, lecturas, convivencia e unha defensa do dereito a seguir aprendendo durante toda a vida.
A UNED Sénior Coruña celebrará o próximo mércores, 30 de setembro, un encontro con motivo do Día Internacional das Persoas Maiores, que oficialmente se conmemora o 1 de outubro, e que servirá tamén como acto de apertura do novo curso académico 2026/2027.
O encontro quere lanzar á sociedade unha mensaxe clara: cumprir anos non significa quedar á marxe da vida.
As persoas maiores seguen tendo moito que aprender, moito que compartir e moito que aportar a unha sociedade que necesita a súa experiencia, a súa memoria e tamén a súa participación activa no presente.
Dende a UNED Sénior Coruña reivindícase unha concepción da vellez afastada dos estereotipos. Ser maior non é soamente cumprir anos. É continuar sendo cidadán, aprendendo, participando, tomando decisións, creando vínculos e contribuíndo ao ben común.
O encontro estará marcado pola convivencia, a música, as cancións e as lecturas, como expresión dunha maneira de entender o envellecemento dende a cultura, a amizade, a aprendizaxe e a participación social.
Despois dunha vida marcada por esforzos, dificultades, alegrías, sufrimentos e numerosos cambios, as persoas maiores queren lembrar que seguen estando aquí e que continúan sendo piares esenciais da nosa sociedade.
A UNED Sénior Coruña considera especialmente importantes valores como o respecto, a igualdade, a solidariedade, a convivencia, a loita contra o racismo e toda forma de discriminación e a aceptación de todas as persoas, dende a convicción de que unha sociedade mellor constrúese contando con todos.
O comezo deste novo curso volve poñer de manifesto que a aprendizaxe non ten data de caducidade. A Universidade pode ser tamén un espazo de encontro para quen superou a idade tradicional dos estudos e quere continuar descubrindo, investigando, viaxando, coñecendo a nosa historia e cultura e, sobre todo, compartindo experiencias.
Porque aprender non consiste unicamente en adquirir coñecementos. Tamén significa encontrarse con outras persoas, escoitar, dialogar, cantar, ler, viaxar, rir e sentirse parte dunha comunidade.
A UNED Sénior Coruña quere converter este novo curso nunha nova oportunidade para seguir camiñando xuntos.
«SER MAIOR NON É DEIXAR DE VIVIR. É SEGUIR TENDO MOITO QUE APORTAR».
Con este espírito, a UNED Sénior Coruña inicia o curso 2026/2027, reivindicando unha sociedade na que as persoas maiores non sexan consideradas unicamente receptoras de coidados, senón cidadás activas, protagonistas e necesarias para construír unha sociedade máis xusta, democrática, solidaria e inclusiva.
UNED SÉNIOR CORUÑA. Aprender xuntos para vivir mellor.
*Mércores 30 de setembro
*Lugar: A GURITA en PADERNE
*Horario:
*12 a 13 horas - ensaios
*13 a 14 horas - actuacións e lecturas
*14 a 15.30 - xantar de confraternidade
*15.30 a 16.30 - actuacións e lecturas.
