Ano novo, con ben veñas

Era canción obrigada nos Nadais de antano cando se ía entrar no tempo que marcaba o comezo dun novo ano, e o desexo referido ó aninovo era que viñese con ben.

Neste 2010, que acaba de entrar precedido dos peores augurios, algo así teremos que pedir e desexar. Polo ben de todos.

Despois da experiencia de 2009, tremendamente forte a efectos económicos e sociais, e cando o resto das economías europeas parecen ter entrado nunha fase de recuperación aínda que sexa modesta, chega o 2010 sen que ningún indicador prognostique “brotes verdes” que dean algo de alegría á nosa actualidade.

Peor aínda: todo parece indicar que non temos chegado á parte inferior da “V”, e que seguiremos baixando e -o que ven ser o mesmo- perdendo emprego, que é o resultado máis sangrante dunha situación de crise.

A entrada neste novo tempo, ateigada de días festivos, e coas SS MM Os Reis Magos exercendo o seu señorío, non é bo momento para albiscar como vai resultar este ano, no que a tradicional costa de xaneiro se entende de prolongada sombra ata o comezo da primavera. Haberá que agardar un tempo para ver como resulta este 2010, primeiro da segunda década do século XXI, no que moitas cousas están no aire e temos que agardar que apousen e asenten.

Pero como os desexos non teñen que ver coas realidades, e sempre se tende á percura das mellores perspectivas, reciban o noso desexo dun Feliz aninovo, e que 2010 responda ás nosas necesidades dun xeito favorable. Que veña con ben este ano novo que acabamos de estrear.