Correccións: Ingredentes imprescindibles do amor

DOMINGO 23 A.- Ez 33,7-9.- Sal 94 (95).- Rm 13,8-10.- Mt 18,15-20

+ Avisaralos da miña parte (Ez 33,7)

+ Oxalá escoitedes hoxe a voz do Señor (Sal 94,7)

+ Se teu irmán peca, vai e repréndeo, pero ti con el só...Se non te escoita leva contigo un ou dous máis... e se á comunidade non fai caso, sexa para ti coma un pagán ou un publicano (Mt 18,15ss)

CORRECCIÓNS: INGREDENTES IMPRESCINDIBLES DO AMOR

1. Deixemos que os nosos ouvidos
das súas xordeiras esperten,
que os ollos perciban camiños
coa axuda espelida da mente,
e os pés tripen ben decididos
os pasos que máis nos liberen.


2. Deixemos que o pulo de vida
os nosos desexos goberne,
que os erros se volvan na cinza
abono que a terra enriquece,
e os ombros o ben e as desditas,
apoien con forza valentes.


3. Deixemos que irado ou con mimo,
alguén nos alerte por veces,
alguén nos axude a estar vivos
sen bafo que oprima envolvente,
e alguén nos encontre servindo
tamén correccións para eles.


4. Que o Espírito Santo corrixa
aquilo que impida o despregue,
do gozo que teima e suspira,
por sermos como Deus nos quere:
irmáns, todos fillos e fillas,
que amor e bo trato se ofrecen.


5. Saiamos do curto egoísmo,
que alleos aos outros nos peche,
con queixas ou con labirintos,
que o noso interior endurece...
¡Deixemos que Deus, tan benigno,
nos goce amantes e ceibes!


6. Coas voces que dun mal avisan
collámolas tal como veñen,
e non desprecemos por frías
ningunha mellora que expresen,
por moito que as formas esquivas
denoten outros intereses.


7. Mais nós que seguimos a Cristo
deamos avisos prudentes,
que nazan do amor compasivo,
e a mágoa e o noxo moderen,
servindo con bo agarimo,
a quen mancaduras padece.


8. Deixemos que a Luz, gran raíña,
nos chame a atopala, se quere,
con berros por mor das feridas,
con mainos murmurios que alenten,
con verbas que esixen xustiza,
con mudos silencios potentes.

Apertas de domingo