José Luis Calo, coordinador de UCIN Galicia, demanda un compromiso firme das administracións para modernizar os centros educativos e reforzar a atención sanitaria ao alumnado.
UCIN Galicia solicita á Xunta de Galicia a posta en marcha dun Plan Integral de Humanización dos centros educativos galegos cun horizonte de execución de dous anos, co obxectivo de mellorar as infraestruturas, a
calidade dos espazos escolares e o benestar do alumnado e do persoal docente.
O coordinador de UCIN Galicia, José Luis Calo, considera prioritario acometer actuacións que permitan adaptar os colexios ás necesidades actuais, incluíndo a creación de espazos máis accesibles, sostibles e seguros, a mellora da eficiencia enerxética, a modernización das instalacións e a ampliación das zonas verdes e de sombra nos patios escolares.
Ademais, UCIN Galicia reclama a incorporación dunha enfermeira escolar en cada centro educativo, unha medida que considera fundamental para garantir unha atención inmediata ante emerxencias, o seguimento do alumnado con necesidades sanitarias específicas e o desenvolvemento de programas de educación para a saúde.
"Os centros educativos deben ser espazos pensados para as persoas, onde a educación, a saúde e o benestar vaian da man. Galicia necesita un plan ambicioso que permita dar un salto de calidade no sistema educativo e ofrecer ás familias os servizos que demandan, sinalou José Luis Calo.
Desde UCIN Galicia defenden que o investimento en educación e saúde escolar constitúe unha aposta estratéxica de futuro, contribuíndo á igualdade de oportunidades, á conciliación familiar e á mellora da calidade de vida da comunidade educativa.
A formación fai un chamamento ás administracións públicas para abrir un proceso de diálogo cos concellos, as ANPAS, os equipos directivos e os profesionais sanitarios co fin de definir e executar un proxecto que sitúe a Galicia á vangarda da educación e da atención ao alumnado.
