UCIN Galicia acusa ao BNG de 'soster politicamente a corrupción do PSOE' tras a intervención da UCO en Ferraz

José Luis Calo carga contra Ana Pontón polo "silencio cómplice" do nacionalismo galego ante os escándalos que afectan ao Goberno.

O coordinador de UCIN Galicia, José Luis Calo, emitiu este mércores un contundente comunicado no que critica duramente ao BNG e á súa portavoz nacional, Ana Pontón, pola súa postura ante os últimos casos de corrupción que afectan ao PSOE e ao Goberno central, tras a intervención da Unidade Central Operativa (UCO) da Garda Civil na sede socialista de Ferraz, en Madrid.

Desde UCIN Galicia consideran que "o Bloque Nacionalista Galego perdeu toda credibilidade política ao continuar apoiando no Congreso a un Goberno rodeado de investigacións, imputacións e escándalos xudiciais".

José Luis Calo afirmou que "cada actuación da UCO, cada rexistro e cada nova información coñecida confirma a gravidade dunha situación insostible para a democracia española". O coordinador municipalista denuncia ademais "a dobre vara de medir do BNG, que presume de ética política mentres cala ante feitos gravísimos que afectan aos seus socios parlamentarios".

"O silencio de Ana Pontón e dos deputados do BNG en Madrid convértese xa nunha forma de complicidade política. Non se pode falar de rexeneración democrática mentres se sostén a un partido acosado pola corrupción e polas investigacións xudiciais", asegurou Calo.

UCIN Galicia lembra que nos últimos meses diferentes cargos e persoas vinculadas ao PSOE apareceron relacionados con investigacións sobre presuntas tramas de corrupción, financiamento irregular, tráfico de influencias e uso partidista das institucións. A formación municipalista considera especialmente grave que "mentres existen ex altos cargos investigados, imputados e mesmo persoas condenadas en distintos procedementos, os socios do Goberno continúen priorizando os seus intereses políticos".

José Luis Calo denunciou tamén "o deterioro institucional que sofre España" e acusou ao nacionalismo galego de "antepoñer os pactos ideolóxicos aos intereses reais dos cidadáns galegos".

"O BNG vende unha imaxe de defensa de Galicia, pero na práctica limítase a apoiar en Madrid todo aquilo que lle garante protagonismo político, aínda que iso supoña mirar cara outro lado ante a corrupción", afirmou.

UCIN Galicia reivindicouse como "un proxecto municipalista e centrado nos veciños", afastado "dos extremismos ideolóxicos e das redes de intereses partidistas que dominan a política estatal".

"Os cidadáns necesitan representantes honestos, transparentes e centrados nos problemas reais dos concellos, non partidos atrapados en estratexias de poder e silencios interesados”, concluíu José Luis Calo.

A intervención da UCO na sede federal do PSOE en Ferraz produciuse dentro dunha investigación xudicial relacionada con presuntas irregularidades e actuacións que afectan a persoas vinculadas ao entorno socialista, xerando unha forte repercusión política a nivel estatal.