Felicidades de Pascua

DOMINGO 2º DE PASCUA (A)- Feit 2,42-47.- Sal 117(118).- 1Pe 1,3-9.- Xn 20,19-31

1.Os irmáns eran perseverantes en escoitar a ensinanza dos apóstolos, na comuñón de vida e no rito de partiren o pan. (Feit 2)
2.A pedra que os canteiros desbotaron converteuse en esquinal (Sal 117 (118), 22
3.[Pola fe] brincades cheos dunha alegría indicible e gloriosa ( 1Pe 1,8)
4. Estes signos escribíronse para que creades que Xesús é o Mesías, o Fillo de Deus, e crendo, teñades vida nel. (Xn 20,31)



FELICIDADES DE PASCUA


1.Benia os que perseverantes,
en compartir axudando
a que a vida chegue a todos,
tamén aos máis marxinados,
encontran esa alegría
segura dos que están salvos.


2.Benia os que como Xesús,
ao se veren desbotados,
viven desde a fe profunda,
inda na noite chorando,
coa esperanza que Deus salva,
con amor resucitando.


3.Benia os que encontran a paz
de Xesús, que nos fracasos
da morte e das feridas,
fixo delas lugar apto,
para trocarmos o mal,
en ben seguindo os seus pasos.


4. Benia os que sen veren creron
en Xesús o mestre santo,
e andando no seu camiño,
puideron un día ollalo,
presencia humilde e triunfante,
nos gozos e nos traballos.


5.Benia os que de Xesús Cristo,
reciben con paz o encargo
de perdoar e curaren
as cadeas do pecado,
e de vivir en Igrexa
coa luz do resucitado.


¡Felices pascuas!
¡Apertas de domingo!