Gañamos

Gañamos. Malia que hai moita mágoa parece que Altri se despide por falla de conexión. Non home! A conexión co pobo non (a quen lle importa o pobo?), a conexión eléctrica, que esa é fundamental. Fundamental que chegue para Altri, non para o pobo. Pois velaique, cando estiras os pés máis que manta, alá vas (cataplás!).

Non está mal facer leña da árbore caída cando ten raigañas de soberbia pero o que conta é celebrar: gañamos nós. Por iso cómpre felicitar e agradecer á xente de Ulloa Viva por dar a cara e loitar. De vós aprendemos que, como dicían os Mejía Godoy, podemos ser pequenos pero xuntos somos un volcán.

Parabéns e acabo cunha reflexión: a loita ten sentido, pode gañarse ou perderse pero sen contestación seríamos ovellas agradecidas. Ao erguerse Palas deu un novo exemplo de civismo.

Xa o dixo o meu querido Bernardo García Cendán:

COA FORZA DO NOSO POBO
HOXE PROCLAMO O MEU CREDO:
"QUERO SER UN HOME NOVO,
PORQUE EU RENAZO GALEGO".
Imos adiante!!