En Begonte renace o Nadal

Dende 1972 en Begonte renace o Nadal. Este foi o ano no que o seu párroco José Domínguez .Guizán decidiu crear un Nadal chairego. Entón, xunto con José Rodríguez Varela buscou a maneira de construír un Belén electrónico cando a electricidade aínda era un soño precario para o rural galego.

Neste belén, como no poema de Bernardo García Cendán, Xesús renace galego (ou chairego) nunha simbiose perfecta entre a paisaxe física que o acolle e a realidade histórica daquela Palestina onde o noso mundo cambiou de era.

Tendemos a pensar no Nadal como unha realidade homoxénea sen pensar que o mundo ten climas distintos, que cando nun hemisferio é verán noutro é inverno ou que o mundo rural é permanentemente excluído das luces cegadoras do consumismo. Pois en 1972, José Domínguez .Guizán e José Rodríguez Varela rachan con isto creando un Nadal xenuíno onde a humildade dá vida ao inicio dunha era...

O mellor do Belén de Begonte é que é un soño que persiste en moitos corazóns. O seus creadores non deixaron unha obra perfecta, tiveron a xenerosidade de abrilo ao progreso para recrear, da maneira máis fidedigna posible, o nacemento dun Xesús tan galego como universal.

Ben merece unha visita este Belén que recrea a os traballos, as xentes, os feitos da Palestina na que Xesús naceu. Unhas vidas afastadas por vinte séculos pero unidas polos duros traballos impostos pola fermosa paisaxe rural.