UCIN Galicia alerta dunha situación límite no Clínico de Santiago e esixe medidas urxentes ante o colapso permanente de aparcamento

O coordinador de UCIN Galicia, José Luis Calo, reclama accións inmediatas e valentes fronte ao déficit xa insostible de prazas de aparcamento no Hospital Clínico Universitario de Santiago, un problema que "leva demasiados anos enquistado pola incapacidade política do Concello de Santiago e da Xunta de Galicia".

Segundo explicou Calo, desde o inicio das obras de ampliación do hospital e da instalación do centro de protonterapia, desapareceron centos de prazas de aparcamento, o que provocou que miles de pacientes, familiares e profesionais padezan cada día "un auténtico calvario para acceder ao hospital".

Promesas incumpridas e ningún avance real
UCIN lembra que en 2024 a Xunta e o Concello anunciaron a "bombo e prato" un suposto gran acordo que incluía:
- mellora dos accesos ó CHUS,
- reforzo do transporte urbano e interurbano,
- posta en marcha dun plan de transporte ao traballo,
- e a creación dun novo aparcadoiro disuasorio.

"Ano e medio despois, non se cumpriu absolutamente nada. Cero avances. Ningunha obra iniciada. Ningunha solución real”, denuncia Calo.
"Foi outro anuncio político feito para a foto, non para resolver un problema que afecta directamente á saúde, á mobilidade e á vida cotiá de milleiros de persoas".

Críticas directas ao Concello de Santiago
UCIN Galicia considera especialmente grave a pasividade do actual goberno municipal de Santiago, formado por partidos que "levan anos prometendo planificación, transporte público eficiente e solucións á mobilidade... e non cumpriron nada do que dixeron".

Entre as promesas incumpridas polo Concello, Calo sinala:
- A creación de novos aparcadoiros disuasorios na contorna de Galeras, Volta do Castro e Santa Marta.
- O reforzo real das liñas de autobús cara ao CHUS, que continúan sen frecuencias adecuadas nin horarios adaptados a quendas hospitalarias.
- A colocación de sinalización intelixente e paneis que xa se anunciara en varios orzamentos municipais.
- A proposta de reordenación viaria na contorna do Clínico, anunciada repetidamente e nunca executada.

"O Concello mira para outro lado. E cando non mira, improvisa. A mobilidade en Santiago converteuse nunha cadea de anuncios incumpridos mentres os cidadáns seguen sufrindo cada día", subliña Calo.

UCIN Galicia aposta por solucións inmediatas e realistas
Calo propón un paquete de medidas de urxencia que deben executarse sen máis atrasos:
1. Habilitación inmediata de prazas provisionais mentres duren as obras de ampliación.
2. Creación dun aparcadoiro disuasorio gratuíto con lanzadeiras cada 5-7 minutos ao CHUS.
3. Reforzo real das liñas de autobús, adaptando horarios e frecuencias ás quendas do persoal sanitario e ás citas hospitalarias.
4. Coordinación real entre Xunta e Concello, con compromisos verificables e prazos públicos.
5. Plan integral de mobilidade para a contorna hospitalaria, baseado en criterios técnicos e non en anuncios electorais.

"Santiago merece algo mellor"
"Santiago merece planificación, coordinación e solucións reais, non máis titulares baleiros", afirma José Luis Calo.
"Os cidadáns están cansos de promesas que nunca se cumpren. UCIN Galicia está aquí para dicilo alto e claro: esta situación é unha vergoña e xa non hai excusa posible.
Pacientes, profesionais e familias non poden esperar máis".

UCIN Galicia comprométese a seguir denunciando esta situación e presentará nas próximas semanas unha batería de propostas formais ante as administracións competentes.