O túnel da Marisma en Foz

Quedoulle o nome de Túnel da Marisma precisamente porque parte da zona chamada a Marisma desembocadura do río Masma que forma a ría de Foz.

Este túnel comezou a construírse en febreiro de 1928, e teño ante min unha curiosa anotación dos días traballados polos obreiros nesa obra, dita anotación foi escrupulosamente feita polo encargado das obras, Celestino Díaz López natural de O Páramo posteriormente casado con María Josefa Fernández (de Burón de Mañente. O sobrenome de Burón, ven porque eran da parroquia de Burón da Fonsagrada).

Estes textos facilitoumos o seu fillo José Díaz (Pepe de Burón) e como digo, comezaron en febreiro de 1928 e remataron en outubro de 1931.

Nestes documentos consta que o túnel foi feito de formigón e o contratista das obras foi Benito Malvar Corbal representado na provincia de Lugo por Esencio Blanco Álvarez, sendo o enxeñeiro da obra Ángel Zubizarreta, e di: Construcción del Ferrocarril Ferrol - Gijón, Trozo 1.º (Sección Foz - Ribadeo).

Noutro documento á parte, encontrámonos cun texto que nos abala con relación a eses algo máis de tres anos da construción do túnel, no que por certo traballaron 26 homes.

Copiamos literalmente unha parte do texto:

"Esencio Blanco Álvarez, representante en la provincia de Lugo del Contratista D. Benito Malvar Corbar,
que lo es, del Ferrocarril del Ferrol del Caudillo a Gijón en su primer Trozo de la sección de Foz a Ribadeo.

CERTIFICO:
Que D. Celestino Díaz López ha desempeñado en esta Entidad, nº. patronal 27/1.104,
el cargo de Capataz, durante un período de cerca de tres años.

Durante el mismo efectuó trabajos de índole diversa, desde el movimiento de tierras a obras de fábrica. Abriendo trincheras y ataque de las mismas organizando la maniobra y encuadrando el personal, con tendencia al máximo aprovechamiento; preparación, encofrado y fabricación de muros de contención de características diversas, tajeas de distintos modelos y túneles como los de La Sara y Mañente, etc...".
O ferrocarril Ferrol - Xixón inaugurouse oficialmente o día 21 de xuño de 1967.

NOTA: O motivo polo cal aparece neste texto literal o topónimo de "Ferrol del Caudillo", é por que ese texto trata dunha solicitude realizada por Celestino Díaz a esta empresa, con data de 22 de xuño de 1947, despois da guerra civil.