Os estaleiros de David del Riego Álvarez, naceron na casa de Carmen López (de Aganchas) preto da salón Bahía (descoñezo o ano).
Desde alí eran trasladadas as lanchas ata o mar por mediación de rolos de madeira os cales previamente untaban de sebo para que esvararan.
Sobre de 1940, este estaleiro pásase para a casa de Granada García Aguiar, viúva de Julio Alonso de conservas Galbán e pouco tempo despois hai un novo traslado ao Campo da Cabana.
Finalmente, e para ter o mar máis preto, faise un novo traslado, nesta ocasión á zona de Tupide xunto á praia da Rapadoira entre 1950 e 1952.
David del Riego construíu barcos tales como: Hnos. Quintanero 1964, Decano 1965, Jesús Divino e Nuevo Gavilán del Mar en 1966.
Debemos destacar, que cando a botadura do Decano en 1965, este tiña que ser remolcado polo Quintanero, pero un fallo no amarre fixo que o Quintanero chocara contra o faro da Rapadoira e estivo a punto de morrer un mariñeiro que caeu ao mar entre o barco e o muro.
Despois da xubilación de David del Riego Álvarez en 1974, o seu fillo José Mª del Riego López (Pepe de David) proseguiu a súa obra construíndo varios barcos. Aínda que compre destacar que o seu fillo Pepe xa comezou eses traballos en 1967.
Destacamos a: Hidalgo 1967, Pena da Rapadoira 1968, Hnos. San Juan 1969, Nuevo Pino Ladra 1971, Nuevo Playa de Cillero e Otero Lage en 1973.
Anos máis tarde, este estaleiro foille traspasado a Francisco Labrada Pedreira (Colorín) o cal o explotou como taller de carpintería.
Estaleiros de David del Riego.
