Os estaleiros de Santiago Pérez Mariño (Santiago da Puebla) foron fundados máis ou menos en 1956 na súa propia casa do Campo da Cabana e máis tarde trasladouse á zona coñecida por Tupide onde anteriormente estivo a fábrica de conservas de Don Luís Gutiérrez que foi pasto do lume o día 9 de agosto de 1939.
Nestes estaleiros construíronse diversos barcos de pesca destacando o "Centauro" que foi o de maior envergadura.
Compre destacar outros barcos construídos por Santiago, como por exemplo: "Enrique José", "Ría de Vivero", "Preguntoiro", "Río Landro", "Hermanos Basanta" ou "Hermanos Villarmea" entre outros.
Non só construíu barcos para Foz, se non tamén para outras localidades, como: "Preguntoiro" para Ribadeo. "Álvarez Linares", "Ría de Vivero", "Río Landro", "Hnos. Basanta" e "Hnos. Villarmea" para Viveiro. "Villa de Llanes", "Eloína", "Luisa Mari" e "Playa de Abascal" para Llanes. "Monterrey" e "Adolfin" Para Lastres (Asturias) e "Flor de Ríos" e "Hnos. Guerra" para Cariño.
Cóntanos Santiago unha anécdota moi curiosa dunha das súas botaduras.
"Cando a botadura do pesqueiro Enrique José, que era a estrea como o barco máis grande, tiven que construír unha ponte para poder botalo.
Tras facer tódalas probas que crin necesarias, e digo crin por que eu era o único que confiaba en que a ponte aguantaría, pois mesmo dous técnicos de motor que viñeran de Francia para colocar a liña do eixo de cola, non a quixeron poñer por que pensaron que era unha perda de tempo.
A pesar de que me daba a risa tanta desconfianza, eu mesmo comecei a dubidar do proxecto, pero arroupado e animado polo meu entrañable amigo Jesús Nécega (Suso de Juan María) que sempre me acompañaba nas botaduras, decidinme a facelo.
Decidinme e solteino, colleu velocidade, pero un pequeno freado antes de caer ao mar fixo que o Enrique José ofrecese aos presentes incrédulos o "saúdo" máis precioso que barco deu na historia.
Nota: Ao caer un barco ao mar na súa botadura, a proa sube e baixa ao mergullarse no mar e volver a emerxer a xeito de "saúdo".
En 1974, traspasoulle o estaleiro a Pedro Fraga (Pedro de Aurelia).
Estaleiros de Santiago Pérez (da Puebla)
