Fíxose pasar por raíña do entroido de Foz

Esta historia que vos vou contar é totalmente certa, pero por protección de datos dos autores, non vou mencionar os seus nomes. É unha historia moi rocambolesca.
No inverno de 2011, chegou a Foz procedente de Zaragoza un rapaz que viña de visitar a uns amigos en Viveiro.
O motivo de parar en Foz, foi porque quería ver o porto e de paso entrar nalgún bar para mercar unhas botellas de viño Ribeiro para levar.
O rapaz que respondía a un nome moi bíblico, pero que eu lle vou a poñer neste artigo o nome de Xacinto, entrou no Bar A Funcional no porto, e despois de mercar as botellas de Ribeiro, púxose a falar co dono do local e preguntándolle sobre cousas de Foz, na conversa, xurdiu o comentario sobre das festas focegas de maior realce, e entre outras, destacouse o entroido.
Ao xurdir a conversación sobre do entroido, Xacinto lembrouse de que a súa noiva foi Raíña do Entroido de Foz (segundo ela lle contou), pero resulta que por motivos que o noso home descoñecía, a súa noiva non tiña ningunha foto dese día, agás unha con moi baixa resolución, que incluso non se identificaba á quen nela estaba.
Xacinto preguntoulle ao dono do bar como podería facer para conseguirlle á súa noiva algunha foto vestida co traxe de Raíña para regalarlle, e sobre todo, poder sorprendela.
O dono do bar aconselloulle desprazarse ao Dandy e que preguntara alí por min, "pois ese home", lle dixo o dono do bar, "foi o creador das Raíñas de Entroido de Foz, e pode que el teña algunha foto", e Xacinto así o fixo.
Como eu non estaba nese momento no Dandy, Xacinto seguiu camiño, pero antes deixoulle á dona do Dandy, un número de teléfono para que eu me puxera en contacto con el, e así o fixen.
Chameino por teléfono e despois do respectivo saúdo e identificarme, pregunteille a Xacinto que como se chamaba a súa noiva, pero automaticamente cando me dixo o nome e apelidos da rapaza, xa lle dixen que no entroido de Foz non houbo ningunha raíña que respondera a eses datos. Xacinto quedouse moi cortado, pero engadiu que a súa noiva foi raíña do entroido de Foz en 1986 ou en 1988, ao que eu lle respondín que era imposible, xa que entre 1983 e 1989 sempre houbo a mesma raíña e chámase Concha Pinto Ferreira.
Xacinto non moi convencido do que lle dixen, pediume o meu enderezo de correo electrónico para enviarme a foto, a cal recibín de inmediato, e levándome a miña sorpresa de que a foto na pantalla do ordenador media uns 5x5 centímetros e ó aumentala, descompoñíase pola súa baixa resolución, pero o pouco que se podía ver, apreciábase unha rapaza practicamente sen roupa como as de Río de Xaneiro, polo que a Xacinto lle dixen, que ese traxe era impensable nun Foz co frío que fai nese tempo no que cadra o entroido, que é en pleno inverno.
A partir de aí, Xacinto envioume unha serie de datos sobre da súa noiva, pois dicía que era de nacionalidade colombiana, que era orfa, e que foi adoptada por un home de Foz e que ela vivía aquí cos seus avós, pero cando me dixo o apelido, xa lle respondín que de Foz non era, podería ser residente en Foz, pero non nativo (o apelido soaba moito a vasco).
Os datos que me aportou Xacinto sobre da estancia da súa noiva en Foz, eran que traballou de asistente social a domicilio, pero nesa documentación aparecían tres enderezos distintos onde a rapaza residiu.
Só fixen unha pequena chamada telefónica e me informei de todo, e garantizovos que a historia era para levar ao cine. Resulta que un dos enderezos era de Vilalba, dun club de nocturno onde ela traballou como prostituta e os outros dous enderezos, eran dunha parroquia de Foz. Nese club de chicas, coñeceuna un home dunha parroquia de Foz e tróuxoa para a súa casa legalmente contratada como empregada de fogar, pero o home que a contratou, cambiou de opinión por razóns que descoñezo, e despediuna e ela foise a vivir a outro barrio desa mesma parroquia (de aí os dous enderezos da mesma parroquia), e acto seguido desprazouse para Zaragoza, onde coñeceu a Xacinto, un xove rapaz divorciado e con tres fillos na súa custodia.
Esa relación entre Xacinto e esa rapaza, durou preto dun ano, pero parece ser que ela volveu a Colombia coa idea de matar a seu pai porque, segundo ela, violouna cando tiña oito anos, pero non sei se o conseguiu e despois de Colombia pasou a Brasil, nación na que ela estaba presa cando a min se me pediu esta información.
Os últimos informes que recibín dela foron os seguintes, primeiro: Que en Brasil estaba no cárcere porque a colleron nas aduanas de Tabatinga (Brasil) con 3.500 gramos de cocaína, que segundo ela, non era da súa propiedade e que alguén lla colocou na maleta.
Segundo: Os datos todos que esa rapaza lle aportou a Xacinto eran falsos, pois loxicamente non podía ser Raíña do Entroido de Foz nin en 1986 nin en 1988, entre outras cousas, porque o seu pasaporte, tiña validez do ano 1990 ao 2000, pero segundo un amigo de Xacinto que é garda civil, o seu pasaporte tiña data de 16 de agosto de 2000, pero que desconfiaba se tería outro pasaporte falso, no que constara a súa primeira entrada en España en 1990.
Terceiro: Que nunca foi adoptada por ninguén, e que non vivía na casa dos seus avós de Foz como ela lle dixo a Xacinto, porque tales avós non existen.

Marchou de Foz con seis mil euros no peto, presuntamente froito dunha estafa a un ancián do noso concello.
A estas alturas de 2018, e despois de pasar tres anos no cárcere en Brasil, volveu a España e traballa de camareira nun bar do sur da península. Xacinto refixo a súa vida con outra muller.