Nos ritos de paso, que marcan coa sinal da dor as historias de vida das persoas, con frecuencia, os seus familiares e as súas amizades, están presentes de diferentes formas e modos. Esa función cariñosa, silenciosa e íntima, axuda a aliviar a intensidade do sufrimento.
Na correspondencia entre Lola e Xosé Maria, aparecen dúas persoas moi queridas, un irmao e umha mai:
A data do día 14 de maio do ano 1987, está ligada á morte de Don Jorge Marcelo Arribe Dopico, irmao de Lola e a do día 4 de outubre do ano 2001 a de Dona María Teresa Devesa Juega, mai de Monterroso.
Lola, contestaba o día 23 de maio de 1987, con palabras entrañables, cheas de dor e de agradecemento á carta de Monterroso:
"Meu caro Xosé-María.
Agradezo-che muitíssimo a tua lembrança e a expressom do teu afecto nestes momentos de dor tan enorme (...). Para mim, meu irmao era como um filho e assim o considerei sempre. Cuidei del de pequeno, paguei-lhe a carreira e ajudei-no quando casou. Agora deixa-me um vazio que ninguém poderá encher".
Na carta do día 30 de outubro, Lola contesta ao seu amigo Monterroso a noticia do passamento da sua mai. Muller profundamente creente, de fe inquebrantable, transmite paz e serenidade nese momentos de profunda dor:
"Meu caro Xosé-María:
Agradeço sinceramente comunicares-me o passamento de tua mai. (...) Nesta altura nom podo fazer outra cousa que rezar. Como sabes, sem dúvida, eu também som crente. [a mai de Xosé María também o era].
Em quanto a ti sei bem a dor que produz a perda das pessoas queridas e o enorme vazio que deixa. Embora saibamos que temos que morrer, a morte sempre nos surprende e, com aqueles que queremos vai umha parte de nós propios. Porem, nom esquezas que tua mai já é plenamente feliz e quer que tu também o sejas, que nom sofras por ela".
