2.5. Cruceiro do Couto
Lugar: Estoa
Parroquia: A Regueira
Esta expresión artística, de carácter privado, está situada no interior dunha finca da "Casa do Couto" e ao carón dun viario. Mostra unha orientación Ne - Sw.
Coordenadas U.T.M. X: 630.490 Y: 4.793.910.
No seu conxunto presenta unha serie de elementos artísticos, que nunha orde ascendente, están colocados da seguinte maneira:
Unha plataforma, formada por tres chanzos de cachotería. Esta serve de apoio a unha base monolítica, de forma troncopiramidal mais coas arestas superiores redondeadas. A base alóngase nun fuste monolítico, de sección cuadrangular nos extremos e coas arestas oitavadas no resto. A cara Ne., está decorada co relevo dos símbolos da paixón na seguinte orde descendente: tres cravos, un martelo, unhas tenaces, unha espada e unha escaleira de dez banzos. A parte superior das súas caras amosa un rebaixe cuadrangular, que leva no seu interior o relevo de dous rombos concéntricos cun roel no centro e dous franqueando os vértices superior e inferior. O fuste serve de soporte a un capitel de forma troncopiramidal invertida, ornamentado con volutas nos seus vértices superiores e cabezas de anxos nas súas caras. O cume do cruceiro remata nunha cruz latina de sección cuadrangular nos seus extremos mais coas arestas biseladas no resto; ademaís, amosa un tipo de cruz florenzada nos extremos do brazo horizontal e na cabeceira. O anverso da cruz mostra, baixo unha cartela anepigráfica, unha imaxe cristolóxica cos seguintes trazos: unha coroa de espiñas na cabeza, inclinada ao lado dereito; os seus brazos están estendidos ao longo da cruz en forma de V pouco acusada mais separados dela ao igual que a cabeza, o lombo e as pernas; as súas mans aparecen abertas e o perizoma está anoado ao lado dereito; e as pernas, lixeiramente flexionadas, amosan o pé dereito sobre o esquerdo e ambos os dous sobre una caveira. Na cara Se., e fora do seu emprazamento orixinal hai unha imaxe pequena, vestida cunha túnica e manto. O reverso da cruz, mostra unha advocación mariana, vestida cunha túnica e manto e coas mans cruzdas sobre a cintura.
2.6. Cristo das Antigas
Lugar: A Lamela (Campo das Camaretas)
Parroquia: Corvelle.
Esta manifestación relixiosa, de dominio privado forma parte da propiedade de José Corral da "Casa de Aloxo". A súa orientación é Norte - Sur.
Coordenadas U.T.M. X: 628.500 Y: 4.793.800.
A nivel artístico, está constituído nunha orde ascendeante polas seguintes partes:
Unha plataforma, formada por un chanzo e un plinto de cachotería; esta serve de sostén a unha base monolítica, de forma troncopiramidal. A base prolóngae nun fuste monolítico, de sección cuadrangular nos extremos e coas arestas oitavadas no resto. O fuste serve de soporte a un capitel reducido, de tendencia paralelepípeda. Na cara Norte, onde se encontra a efixie cristolóxica, hai un pinxante, baixo o capitel. Finalmente, o conxunto remata nunha cruz latina, de sección cuadrangular nos extremos e coas arestas oitavadas no resto; ademaís, mostra unha cruz florenzada nos extremos do brazo horizontal e na cabeceira. O anverso, baixo unha cartela anepigráfica, mostra unha talla de Cristo coas seguintes características: unha coroa de espiñas na cabeza, inclinada ao lado dereito; os seus brazos están estendidos, en forma de V pouco acusada ao longo da cruz e as mans aparecen abertas; o perizoma está anoado ao lado dereito; e as pernas, lixeiramente flexionadas, amosan o pé dereito sobre o esquerdo.
O plinto esta deteriorado na parte superior, así como a talla de Cristo. O fuste, o capitel e a cruz son dunha soa peza. Ademaís, este Cristo é moi semellante aos de Romero; Amorás; Cervelo; Xan Paz; Alto das Fontelas; Arandal; Centro de Saúde...
